Muxuka Kabi Etxea (Asteasu)

Gazte-gaztetatik begiratu izan diot zentzu kritikoz gaur egungo hezkuntza-sistemari; izan ere, nire ikaskuntza-erritmoarekin bat ez zetozen ikaskuntza-metodo zentzugabeen bidez ikastera behartzen gintuztela sentitzen nuen eta, askotan, ikasi bezain pronto ahazten nituen gauzak.

Geroago, haurrentzako zentroetan lan egitearekin batera eta ia urtero gure komunitateetan egiten den ebaluazio diagnostikoa ikusita, ohartu nintzen badela garaia haur txikien erritmora joatekoa eta haur bakoitzari modu egokian lagundu behar diogula ezagutzak lortzen, guztiok desberdinak garelako eta beraz, ikaskuntza-prozesua ere desberdina dugulako.

Kabi Etxeetako hezitzailea izateko azken prestakuntzan, hezkuntzaren, pedagogiaren, errespetuzko hazieraren, psikologiaren, biodantzaren edota dantzaren munduarekiko konpromiso irmoa zuten beste emakume batzuk ezagutu nituen eta horrek haurtzaroari modu zuzenagoan lotzeko grina piztu zidan.
Eguneroko ikaskuntza-prozesuan haurrak babesa sentituz haztea da helburua; haurraren gaitasunak indartzea eta izan ditzakeen mugak txikiagotzea, trabarik jarri gabe, partaide izanez.

“Zu zeu izateko eta etxean bezala hazi ahal izateko lekua”.